Weer naor de Aachterhoeke

Ik was gisteraovend om acht ure thuus en poes was d’r niet. Ik wodde zuver al wat ongerust. Eerst om tien ure was hi’j d’r inienend weer. Et kan wel es zo west hebben dat hi’j me op die meniere weten laoten wol dat et gien meniere van doen was en laot him een midweke allienig. Ok al keek Anke elke dag bi’j him. Ik hebbe mien schuld votdaolik ofkocht mit snupies van Whiskas en now is alles weer goed tussen oons. Ik daenke trouwens nog algedurig an dat mooie huus van oons in Lochem. We hebben in dat huus nooit last van de waarmte had. Et ligt in de bos onder hoge bomen. De auto ston zodoende ok altied lekker in et schaad. En dan elk een slaopkaemer mit een badkaemer. Now we d’r twie jaor aachter mekeer west hebben, vuult et aenlik al slim eigen. Dat et is wel haost zeker dawwe d’r nog es een keer hennegaon. Vleden jaor konnen we mar iene dag fietsen omdat et almar regende. Dit jaor konnen we mar iene dag fietsen vanwege de hitte. D’r bin dus nog zat mooie fietstochten te maeken en Doesburg en Gruunlo bin ok zeker de muuite weerd en kiek daor es. Mar ja, we kun d’r allienig nog een keer henne awwe et platte van de voeten onderholen. Aanders gaot et niet deur. Ik gao morgen trouwens drekt al weer een dag naor de Aachterhoeke. Ik vertelle daor morgen wel over. Vermoedelik komt d’r morgenvroeg een klein dagboekstokkien. En dan aovens niks meer, want ik komme eerst laete thuus.