Weer in Noordwoolde

Vleden zaoterdag wa’k mit Jan en Diana in Noordwoolde en vandemiddag wa’k d’r al weer. Ik moch in et Buurthuus vertellen veur 32 leden van de Onofhaankelike Senioreverieninge Noordwoolde (OSN). Dat was dus percies twie keer zovule volk as eregister in Wapservene. Et gong prima, ik vun et heerlik om te doen. Et was mooi dat ex-kollega Jan van der Veen d’r ok was. Ik bin d’r disse keer zo now en dan wel bi’j op een taofeltien zitten gaon. Dat dee Vrouw Hof eertieds ok. De bitterballe nao ofloop was lekker! Vroeger vertelde ik bi’jtieden wel vier keer in de weke en twie keer op een dag was ok hiel gewoon. Ik zol op 2 november ok twie keer vertellen. Zowel morgens as aovens in Et Vene. Zoks wodt me now te bar, dat ik hebbe et optreden van morgens ofzegd. Ik wodde gisteraovend beld deur een aorige man van de radiostudio in Veendam. As ik nog es langeskommen wol om wat verhaelen te vertellen, die nammen ze dan op veur heur streektaelpergramme. Een peer jaor leden bin ‘k daor ok west. Christine Mulder het d’r neffens mi’j ok al es west. Mar zoks doe ik niet weer. D’r bin meer Stellingwarver schrievers as Christine en mi’j. Ik hebbe de man naor de Schrieversronte verwezen, dan kun ze him daor in kontakt brengen mit aandere schrievers. Dan moe’n die ok mar es naor Veendam. Zoks is best hiel mooi om te doen. Et is ok mooi om aorige reakties te kriegen op mien kollums in de kraante. Op ‘e kollum van gister kwammen lieve reakties van Nelja uut Sneek, Jemke uut Harlingen en Geertje uut Liwwadden. Hieronder nog een foto van vandemiddag. Dit is de bekende lokemetief die in Noordwoolde veur et oolde tramstesjon staot.