Weer goold en zulver

Ik zat om vuuf ure weer op et puntien van de stoel. Wat een prachtig sukses op ‘e 500 meter veur vrouwluden. Goold veur Femke Kok en zulver veur Jutta Leerdam. Krek aandersomme as op ‘e 1.000 meter. En wat een tied van Femke Kok! Onveurstelber! Wat moet et fantastisch wezen aj’ goold winnen op ‘e Olympische Speulen, et volkslied veur je speuld wodt en je vader en moeder tussen al dat oranje op ‘e tribune zitten. Dat moet een machtig gevuul wezen! Nederlaand staot now, geliek mit Zweden, vierde in de medalliespiegel nao Noorwegen, Italië en de Verienigde Staoten. Dat is beslist niet gek en we bin d’r nog niet.

Vleden jaor kree’k op mien verjaordag een oold mar nog net ienpitspieteromstellegien. Ik hebbe et now es een keer uutperbeerd. Hebbe d’r laampe-eulie in daon en d’r doe een sukadelappien in een pannegien lekker een ure of drieje op sudderen laoten. Et was heerlik. As goenend in opdracht van Poetin de boel es een keer hacken of hier en daor wat kabels op ‘e zeebojem deurfieken en we gien stroom meer hebben, kan ik in ieder geval wat waarms toemaeken op mien pieteromstellegien. Ik hope dat zoks nooit neudig wezen zal, mar ik gao d’r vanuut dat et grif wel es gebeuren gaot in disse malle wereld.