WEC

We bin vandaege op stap west. Et was gien fiets- of bootweer, dat we bin d’r in de auto op uut west. Eerst hewwe op ‘e Gediek bi’j uutgeveri’je Bornmeer 50 exemplaoren van Pake en beppe Pluus, et Stellingwarver Nijntje-boekien, ophaeld veur de verkope. Vervolgens biwwe naor Lauwersoge reden. Daor hewwe et WEC bekeken, et ni’je onderkommen van de zeehonties uut Pieterburen. Daor in Pieterburen wawwe indertied ok wel es west. Mar wat hebben ze now een mooie behuzing. Wat een prachtig en groot gebouw. Ie kun daor de zeehonties zien die nog een protte rust hebben moeten en goenend die al weer wat beter binnen. Mar ie kun d’r ok een prachtige film over et Wad bekieken en ok een boel leren over hoe de maone mit eb en vloed te maeken het. En dan de trek van de aol naor de Zaragossa Zee. Zesduzend kilemeter van hier. Et is allemaole onveurstelber. In resteraant Schierzicht hewwe petat mit vis had. Ik hadde scholfilet. Hieronder twie foto’s die ‘k vanof et dak van et WEC maekt hebbe. Boven: de haven van Lauwersoge. Onder: ien van de veerboten die naor Schiermonnikoge veren. Vanof et dak hej’ een schitterend uutzicht en kuj’ et eilaand in wezen vlakbi’j liggen zien.