We vermaeken oons best

Et weer zit oons tiedens oonze vekaansie niet mit, mar we vermaeken oons best. We hebben de verwaarming in et huus an en de lange broek en een truigien an. Et regende vandaege tot even in de middag. Daornao wodde et beter en waarmer, mar doe was et al te laete en gao fietsen. We hebben vandemorgen naor de beëdiging van et ni’je kammenet keken. Et liekt oons gien goed spul toe. Om et middagure henne biwwe op stap gaon. We bin naor Vorden gaon. Bi’j de VVV hewwe een fietskaorte veur de Achtkesteletocht kocht. Wi’j praotten Stellingwarfs en de vrouwluden van de VVV Aachterhoeks. We hebben een twaelfuurtien had in De Herberg in Vorden. We hebben ok nog een tentoonstelling van mooie schilderi’jen mit vrouwluden d’r op bekeken in de grote karke van Vorden. We bin doe naor kesteel Ruurlo gaon. Daor was et drok. Een prachtig kesteel en onderdiel van museum More. Ik was d’r al es mit Fettje west. We hebben de vaaste kollektie bekeken: de neorealistische schilderi’jen van Carel Willink en de nogal opzichtige jurken van Fong-Leng die zien vrouw Mathilde indertied an hadde. Veerder was d’r een prachtige tentoonstelling over et mooiste uut 40 jaor Tussen Kunst en Kitsch. De duurste en meerst opzienbaorende dingen die in dat tillevisiepergramme te zien west hebben. Echt hiel arg mooi. In de Oranjerie hewwe nog wat drinken en heerlik kossegebak had. Vervolgens hewwe de binnenstad van Lochem bekeken. Ik hebbe en mooie margriet kocht veur in de tuun en we hebben weer bosschoppen daon. Et was een welbestede dag! Hieronder twie foto’s. De karke van Vorden en kesteel Ruurlo.