Wat een gedoe

Now ik weer thuus bin, is d’r votdaolik alderhaande gedoe. De auto geft drukverlies an. Daor moet naor keken wodden. Anke ontdekte dat de ni’je cv-ketel argens een betien lekt. Daor moet dus naor keken wodden. De grote komputer vertoont wat kuren. Daor moet dus naor keken wodden. Anke ontdekte dat poes een wormkure hebben moet. Ze stuurde oons een appien doe we in Lochem weren. Daor moet dus wat an daon wodden. We hebben in Laren bi’j Lochem al tebletten kocht die veur honnen en katten bruukt wodden kunnen. Mar poes wol dat spul niet hebben. Ik hebbe van alles perbeerd. Ze oplost in wat koffiemelk, ze an stokkies verstopt in lekkere stokkies wost en zo… Niks hulp. Om raodeloos van te wodden. Vandemiddag he’k naor Wolvege west en daor tebletten kocht die allienig veur poezen binnen.. En die at poes tegere mit kepotmaekte kattesnupies wel op. Wat een gedoe allemaole.

Ik hebbe vandemiddag even op Industrieweg 15 in Wolvege west. Daor eupende Computerservice Hofma vleden weke maendag de deuren, mar doe gongen Jelle en ik krek op vekaansie. Vandaor da’k d’r now even keken hebbe. Hiel mooi! Hier kan Jarmo veureerst wel mit uut de voeten. In een keurig net jassien helpt hi’j de klaanten. Ik hebbe een foto van de jonge ondernemer maekt!