Wasstraote

Ik hebbe vandemorgen eerst even naor de beëdiging van menisters en staotssiktaorissen keken. Die beginnen an een drege klus, dat liekt me een ding dat zeker is. Vervolgens bin ‘k naor Jarmo van de zo staorigan meer as bekende Computerservice Hofma in Wolvege gaon. Hi’j het eerst mien radio opni’j insteld. Een peer jaor leden he’k al een radio op batteri’jen kocht veur as de nood an de man komt. Mar die ston insteld op digitale zenders en die liggen d’r drekt uut as et misgaot. A’k de radio now androkke krie’k drekt op FM Omroep Frieslaand te heuren en dat is hiere de rampezender. Dat as Poetin of een aandere gek opdracht geft an hackers om hier de boel plat te leggen en dat verschillende kabels in de Noordzee deurfiekt wodden moeten, kan ik in ieder geval nog wat waarm maeken op een pieteromstellegien en naor de radio luusteren. Daornao het hi’j mien auto van binnen schonemaekt. Hi’j vun dat et d’r smerig uutzag. Now ja, dat moet toch ok, aanders ziej’ nao et schonemaeken gien verschil en hoej’ zoks ok niet doen te laoten. Ik hebbe vervolgens de ni’je keuken in zien huus bekeken en we bin naor sjefeursresteraant De Stoof gaon om daor een happien te eten. Ik hadde zoas haost gebrukelik een heerlik twaelfuurtien. En doe biwwe mit de auto deur de wasstraote gaon. An de buterkaant was de auto echt hatstikke smerig nao de winter. Wat een verschil! Now ja, en doe he’k mit Jarmo en zien moeder nog een bakkien thee dronken. En zo wol de dag wel weer omme. Hieronder nog een foto. Tegenover disse man zat ik te eten.