Wasbeurt auto

Jarmo het vandemorgen mit mien auto deur de wasstraote west. Ik hebbe ok een settien bi’j him kocht zoda’k mien smartphone now ok in de auto oplaeden kan. As d’r hackers in opdracht van Poetin of Xi hier de boel platleggen en we een tietien gien stroom hebben en van alles ofsleuten binnen, kan ik de tillefoon toch oplaeden. Dat geft wel een goed gevuulte. Nao et autowasken hewwe luncht in De Stoof. Ik hebbe een heerlik twaelfuurtien had. Woensdag maekt hi’j mien auto van binnen ok nog schone. Dan za’k toch naor him toe mit mien komputer en de laptop veur de jaorlikse servicebeurt. Et antivirusabonnement moet ok verlengd wodden. Mooi dat hi’j dat dan allemaole in ien keer doen kan.

Om disse tied henne bluuien de lidkaktussen. Ik hebbe d’r drieje volop in de bluui of nog in de knoppen zitten. Hieronder een foto. Disse knaop past op gieniene veensterbaank meer. Hi’j staot op ‘e overloop bovenan de trappe en hangt in wezen in et trappegat.