Warkdag

Et was vandaege een gewone warkdag. Niks paosen of wat flinterknippen of zo. Ik hebbe nog flink wat wark daon veur et grote en nog altied geheime projekt daor we mit an de gang binnen. Schrieven, anvullen, verbeteren, veraanderen…. Butendat wodde me vraogd om wat biezunders te maeken/schrieven. Wat riemends van vier regels boven een bar. En zo is d’r altied wel wark.

Een goeie weke leden was mien laeste optreden van et seizoen veur een groep vri’jwilligers van de karke, hier in oons mfc De Schieve Deure. D’r wodden me nog wat foto’s van toestuurd. Ze staon hieronder. Boven: de praotiesmaeker is an et woord. Onder: diezelde praotiesmaeker krigt bloemen van Meintje. Die bloemen staon hier nog in de kaemer. Op die aovend raekte ik an de praot mit een vrouw uut Hooltpae. Al praotende dee blieken dawwe twaelf daegen in leeftied verschillen. Ik bin van 6 jannewaori 1946 en zi’j van 18 jannewaori 1946. En… we bin allebeide geboren in Huze Lycklama in Wolvege. Hiel misschien hewwe nog wel een dag naost mekeer legen te raozen.