Warkdag

Ze zeggen wel es: zundagswark is niet stark. Ik hebbe me daor niks van antrokken en d’r vandaege een warkdag van maekt. Ik hebbe vandemorgen een poletieke kollum, die ‘k al schreven hadde, nog wat befiekt en bedaon en die an iene lezen laoten. As et zo wel kon… Want ja, veurdaj’t weten hej’ een koppel volk veur et huus staon te raozen. Ik hebbe ok nog twie kollums in klad schreven. Ik gao ze laeter wel bewarken en uuttikken. De tekst staot now in ieder geval roegweg op pepier. Iene over et opnemen in et ziekenhuus en iene over et oolder wodden. Ik wor in jannewaori 80… Vandemiddag he’k een advekaotkeek bakt en een panne mit makkeroni klaormaekt. Now zit ik een peer daegen niet mit etenkokeri’je.

Hieronder een prachtige kaorte die Douwe me toestuurde. Dit liekt poes Marja werachtig wel! Van mien eerst verdiende geld kocht ik in 1963 een klein plaetespeuldertien en ien van de eerste plaeties die ‘k kocht was Spiegelbeeld van Willeke Alberti. Et ligt nog argens boven op ‘e zoolder. Mar daor mos ik dus an daenken doe ‘k disse kaorte zag. Spiegelbeeld, vertel eens even…