Johan Veenstra
Stellingwarver schriever en verteller

Waetersnoodramp 1825 (3)

Plaetst op 2 feberwaori 2025.

Vergeleken mit de Kop van Overiessel bin d’r in West-Stellingwarf mar weinig meensken verdronken in 1825. Negen meensken overleefden de ramp hier niet. Laeter kwammen daor vanzels nog honderden meensken bi’j die an de malaria uut de tied raekten. Hier dan de negen meensken die in die vreselike feberwaoridaegen verdronken. In Spange verdronk Hendrikje Bartelds (60 jaor). In Ni’jhooltpae verdronk Luitje Klazen van der Schoot (81 jaor). In Sliekenborg verdronken Roelofje Alberts (67 jaor), de vrouw van Jan Teunis Jochems Dragt en twie kleinkiender van heur verdronken ok. Koendert Egberts Dijkstra (5 jaor) en zien zussien Roelofje Egberts Dijkstra (2 jaor). In Ni’jhooltwoolde verdronken Baukje Annes (52 jaor), de vrouw van Albert Jans Scheenstra. Heur zeune Jan Alberts Scheenstra (10 jaor) verdronk ok. Butendat verdronk Stijntje Hendriks Hilbink (54 jaor), de vrouw van Willem Broekert. Heur dochter Geertje Willems Broekert (16 jaor) verdronk ok. Wat een drama’s. Vanaovend om acht ure luden de klokken 18 menuten en 25 sekonden ok veur heur. Ik hebbe vandemiddag nao et eten weer even een kuier maekt en oonze mooie Nicolaaskarke op petret zet. Zie hieronder. Ik zal om acht ure boven veur een eupen slaopkaemerraem staon gaon om even naor et luden te luusteren. Et geluud van de klokken is dan een schaekel tussen heden en verleden. Woensdag komt hier een verslag van de gemientelike herdaenking van de ramp.