Johan Veenstra
Stellingwarver schriever en verteller

Waetersnoodramp 1825 (1)

Plaetst op 27 jannewaori 2025.

In drie van mien elf ammarillen he’k now al een dikke knoppe zitten. Dat is een mooi begin en ik hope inderdaod dat dit et begin nog mar is.

Ik hebbe vandaege et lange verhael daor a’k mit doende was in klad ofmaekt en ok een dadde pat al uuttikt en opsleugen in de komputer. Et verhael gaot van Silverboys hieten. Et het te maeken mit de Waetersnoodramp van 1825. Vandaege ston daor een groot stok over in de Liwwadder Kraante. In de dagboekstokkies in et kommende weekaende za’k daor ok andacht an besteden. Op 3, 4 en 5 feberwaori 1825 wodden we troffen deur een verschrikkelike stormramp. De dieken van Zuderzee en Lende brakken op verschillende plakken. Op een protte plakken wodt die ramp herdocht. De kommende zundagaovend, op ‘e veuraovend van de ramp, zullen in Frieslaand van 120 karken en klokkestoelen de klokken luden. Dat zal om percies acht ure gebeuren en de klokken luden dan 18 menuten en 25 sekonden. Ok de klokke van oonze Nicolaaskarke in Ni’jhooltpae zal luden. In Ni’jhooltpae verdronk in 1825 een man van 81 jaor. De gemiente West-Stellingwarf wodde indertied zwaor troffen. Veural de Westhoeke. Haost de hiele gemiente kwam onder waeter te staon. Et waeter ston tot an et west van Berkoop. Op donderdag 5 feberwaori wodt de herdaenking in West-Stellingwarf op twie plakken hullen. Daor mag ik ok an mitdoen. Meer ni’js komt dus in volgende dagboekstokkies.