Wacht op mij

Et was vandaege weer prachtig Eupen Stal-weer. D’r was zodoende best wat anloop. De verkopen gaon goed. In de stille uren van 1 tot 2 en 5 tot 6 lees ik. Ik wil zeker vier boeken lezen in Berkoop. Ik hebbe een hiele riegel boeken van Santa Montefiore in de boekekaaste staon. Daor komt now weer iene bi’j. Ik hebbe Wacht op mij lezen. Een mooi boek. Et verhael begint in Gulliver’s Bay (Cornwall) in 1944.  As Rupert Dash sneuvelt tiedens de Slag om Arnhem is zien vrouw Florence d’r hielemaole kepot van. Ze kan niet aksepteren dat hi’j nooit weerommekomt. As ze een gedicht mit de titel Wacht op mi’j vint, daenkt ze dat dat een teken is. In Londen het Max in 1988 hinder van vreselike dromen die almar weerommekommen. Hi’j hangt an een parresjute en belaant in et gebied van de vi’jaand. D’r wodt almar scheuten en hi’j gaot dood op et slagveld. In 1995 krigt Florence in Melbourne een brief van Max. Ze het nog nooit van him heurd, hi’j woont an de aandere kaant van de wereld. Mar die brief maekt een hiele protte dudelik.