Vuurdeup

Nog even over gister en oons bezuuk an et attilleriemuseum. Daor kwammen nogal wat herinnerings bovendrieven. We bekeken daor naemelik ok et leslekaol daor in 1983 een verschrikkelik ongelok gebeurde. Een mortiermien ontplofte en dat kostte zeuven soldaoten et leven. Uut een onderzuuk dee laeter blieken dat d’r mit ondeugdelik spul oefend was. D’r bin nog gatties in een mure te zien. Naost dat leslekaol is now een stilteruumte. Ik mos vanzels votdaolik daenken an et verschrikkelike ongelok da’k zels as soldaot mitmaekte op ‘e Leusderheide. Dat was op 10 meie 1966. Ik hadde krek mit een scharpe haandgrenaot  gooid en zat weer in de bunker. Ien van de jongen die nao mi’j gooien mos, leut de grenaot an zien kaant van et muurtien valen. Luitenaant Van de Groenekan was dood, de jonge mos een oge missen. We mossen lange in de bunker blieven totdat alles opredded was. Ik hebbe et beschreven in mien roman Een vrouw van ivoor. Mar daor docht ik gister dus an, daor daenk ik trouwens elke tiende meie an. Ik mos gister in ’t Harde ok daenken an de vuurdeup die ik daor nao die tiende meie in datzelde jaor kreeg. Vanuut de Vloeddiekkezerne in Kaampen reden we naor ’t Harde. Al tiegerende onder draodeboel deur kregen we daor de vuurdeup en scheuten ze mit scharp over oons henne. Daor docht ik dus ok an. Hieronder nog een foto die ‘k gister maekt hebbe. Dit is een panorama van soldaoten in Nederlaans-Indië mit een 25 ponder.