Vuur an de locht

De locht was vannaacht om ien ure henne haost niet zonder vuur. Et gong d’r vreselik omweg. Ik bin bange veur onweer, dat ik bin van bedde gaon, hebbe de kleren antrokken en de veurdeure van et slot daon. Doe bin ‘k mit mien tasse en een buuslanteern op ien van de trappetreden zitten gaon. As et misgaon zol kon ‘k zo votkommen. Poes gong even laeter naost me op ‘e trappe zitten. Die docht vanzels: as de baos bange veur onweer is, moe’k mar vlakbi’j him zitten gaon. Om half twieje was et slimste oflopen en bin ‘k weer op bedde gaon. In et ni’js heurde ‘k dat een vrouw van 25 van De Jouwer een boom op heur auto kreeg en dat niet overleefd het. En dat gebeurde in et Drentse dorp ’t Haontie. Daor bin Jelle en ik woensdag nog deurhenne fietst. Wat een mal toeval.

Ik bin nao de peer vekaansiedaegen drekt weer an ’t wark gaon. Steven mailde me de tekst van een lietien veur de film Sultan van Bercoop. Hi’j perbeert Stellingwarfs te schrieven. Dat is mooi! Mar hi’j verzint him nog wel es mit de ao en de ae-klaank. En ja, as ik daor goed Stellingwarfs van maeke, riemt et niet meer. Ik perbere dan aandere zinnen te bedaenken in etzelde ritme en dat et dan wel riemt. Ik wil et dit weekaende aenlik ofmaeken. Vandemiddag he’k een klein fietstochien van 23 kilemeter maekt. Even Berkoop en De Hoeve omme. Morgen za’k een grotere fietstocht maeken. Hieronder een foto die ‘k vandemiddag maekt hebbe. Bi’j de sluus van Ni’jhooltpae, die aachter de bome- en polleboel niet te zien is, komt de Noordwooldiger Vaort in de Lende.