Vuuftig – Gien woord tevule

Ik hebbe vandaege de verhaelen en gedichten uutzocht die ‘k vandeweke vertellen zal in Steggerde, Berkoop en Noord-Slien. Butendat he’k veerderwarkt an een lang verhael daor a’k de laeste tied iederkeer mit an de gang bin. Ik bin de nog wat roege schreven tekst now an et uuttikken en zal daor morgen wat meer over vertellen.

Ik hebbe de laeste tied et boek Vuuftig – Gien woord tevule lezen. Dat is et jubileumboek van de vuuftigjaorige Stellingwarver Schrieversronte. Dat jubileum was in 2022. Et is een mooi uutgeven boek mit een protte foto’s. Ik wete netuurlik alles wel, want ik was d’r bi’j doe de Schrieversronte opricht wodde. Dat was op 29 april 1972 in de oolde ulo in Wolvege. Wat is d’r in al die jaoren een protte gebeurd en uut de wege zet. Alderhaande politici zollen dit boek es goed lezen moeten. Dan zollen ze lichtkaans niet zo dom wezen en gao de helte op ‘e subsidie kotten zoas de perveensie Frieslaand doen gaot. Mar och, misschien interesseert et heur in Liwwadden in wezen allemaole gien klap. Hoevule as d’r hier ok bi’j mekaander vrot wodt. De Schrieversronte en et Stellingwarfs hebben ieder zien steun broodneudig. Veur 25 euro in et jaor kuj’ abonnee wodden en dan kriej’ et mooie tiedschrift De Ovend jaors zes keer over de heerd. Doe et mar!