Vrundemiddag

Et is een hiele roezige dag. Vandemorgen kwam overbuurman Bert mit een boek da’k bi’j him besteld hadde. Et boek Niet normaal zo normaal is een autobiografisch boek van en over zien breur Henk uut Ni’jberkoop. Krek veurdat et boek uutkommen zol is Henk wegraekt. Wat dramatisch… De dokters veurspelden indertied dat hi’j mar 4 jaor wodden zol, mar hi’j is toch nog 52 jaor wodden. A’k et boek lezen hebbe, kom ik hier uutgebreid op weeromme.

Vandemiddag wa’k in et Centrum veur Prentkeunst op ‘e Fochtel veur de Vrundemiddag van de Stichting Nobilis. D’r bin zo staorigan al haost 500 Vrunden. Dat is geweldig en dat komt gewoon ok deur et charisma en et geweldige enthousiasme van Pieter (Jonker). De zael van dörpshuus Et Legien zat vol vandemiddag. We kregen heerlik oranjegebak. As Vrunden kriegen we allemaole ok nog een prachtige prente van Antje Veldstra uut Grunningen toestuurd. D’r wodde eerst ofscheid neumen van Beint Koopstra die 33 jaor in et bestuur van Nobilis zeten het. Vervolgens interviewde Pieter Antje Veldstra, de grande dame van de Nederlaanse prentkeunst. Et wodde een mooi gesprek. Ze vertelde over heur wark en we zaggen wark van heur op een groot scharm en d’r was een kleine tentoonstelling van heur wark. Ik trof Fenna uut Assen daor vandemiddag. Mit heur he’k geregeld mailkontakt naor anleiding van disse dagboekstokkies. Wat aorig dawwe now even praoten konnen. Ik hebbe in de stromende regen nog een vrouw naor et busstesjon van Oosterwoolde brocht. Van daor mos ze nog mit de bus naor Drachten, dan mit de bus naor Grunningen, en dan nog mit de trein naor Winschoten. Een hiele reize, mar de meensken kwammen vandemiddag overal weg.

Now bin ‘k even thuus en dan za’k weer vot. Ik zal vanaovend uut eten mit mien goeie vrunden Johan en Gertie uut Almelo. Ze zitten een peer daegen in hotel Lunia in Berkoop en we eten aanst in resteraant Boszicht in Ni’jberkoop. In verbaand mit corona hewwe mekaander te lange niet zien. Dat betekent dawwe een protte te vertellen hebben en dat et slimme genoeglik wodt!