Vrouwe van Mellyn

Ik hebbe vandaege an ’t wecken west: twie potties rooie bieten en een pottien stoofpeerties. Ik gao de kommende donderdag nog vule meer stoofpeerties wecken. En laot de winter dan mar kommen!

Geertje stuurde me laestdaegs et boek Vrouwe van Mellyn van Victoria Holt uut de Margriet-pocketserie uut 1964. Victoria Holt was indertied een beroemde en geweldig goed verkopende schriefster. Mar ze hiette aenlik van Eleanor Alice Hibbert-Burfurd (1906-1993). Ze schreef tientallen boeken en bruukte verschillende pseudoniemen. Ze schreef keuninklike biografienen onder et pseudoniem Jean Plaidy. Ik hebbe twie boeken van heur onder die naeme in de kaaste staon: Isabella van Castilië en Catharina van Aragon. As jim op schoele goed oplet hebben, weten jim dat dat moeder en dochter binnen. Vrouwe van Mellyn he’k zowat in iene aosem uutlezen. Et was spannend, al wus ik vanzels wel dat et op et aende goedkommen mos. Et boek gaot over Martha Leigh. Die begint mit een wat aekelik gevuul an heur ni’je baene. Ze gaot in et grote huus Mount Mellyn veur et jonge maegien Alvean zorgen. Die heur moeder is verongelokt. D’r wodt zegd dat ze verdronken is. Mar is dat wel zo? De vader van Alvean is de baozige Connan TreMellyn. Hi’j maekt grote indrok op Martha en al gauw verget ze de wat wondere sfeer die in et huus hangt. Ze raekt hielemaole in de ban van Connan zien leven, hatstocht en geheimen. Een roman over moord, passie en romantiek. Wat wil een meenske nog meer! Et is weer es wat aanders as al die Skandinavische thrillers.