Vrouw te zuke

Veurda’k vandaege naor Berkoop gong he’k een aentien fietst. Ik bin bi’j de Kuunder langes naor de sluus onder Iegypte fietst. Op et fietspad van de Kuunder naor de Kuundervallei kwam me een man lopende integen. Hi’j hul me staonde en vreug as hi’j in de richting van Berkoop leup. Hi’j leup dus goed! Vanof de sluus bin ik naor Berkoop fietst en daor he’k gauw wat bosschoppen in de supermark daon. Vervolgens he’k nog een aentien ommefietst en doe he’k bi’j de Koepelbos een brotien hamburger mit mayo behaffeld. Hiel lekker! En doe bin ‘k naor mien verkoopplakkien in et gebouw van de Schrieversronte gaon. Et is niet slimme drok op Eupen Stal, dat he’k werachtig wel es aanders mitmaekt. Et zal lichtkaans wat te waarm wezen. Mar et is een goolden plakkien veur een schriever. Vandemiddag was d’r inienend een vrouw te zuke. Ze was an de begeleidster ontsnapt. Ik hebbe et hiele gebouw deurzocht en zag in mien grote fantesie al et begin van een thriller veur me. Mar ze bleek gewoon deur de veurdeure ontsnapt te wezen en is weer vunnen. Gelokkig mar. Ik bin vanaovend weer bi’j de Kuunder langes naor huus fietst. Op die meniere he’k vandaege toch ok nog 34 kilemeter fietst.