Vroege fietstocht

Ik hebbe vandemorgen eerst nog wat verhaelen rippeteerd veur et optreden van morgenmiddag. Et is vandaege trouwens nog mar 9 meert… Nooit eerder he’k zo vroeg in et jaor een fietstocht maekt. De wereld is kompleet op ‘e giebe. Ik bin vandemorgen nao et rippeteren bi’j de Lende langes naor de Driewegsluus reden en doe naor Ooldemark. Onderwegens zag ik tal van meensken in de kotte broek en mit blote aarms. De meensken bin drekt ok zo overstuur. Zo snikhiete was et now ok weer niet. Zokken zal et d’r trouwens naor vergaon. Koolde op ‘e blaoze en koolde pip zal heur diel wezen. In Ooldemark he’k op et terras van Family een lekker twaelfuurtien en wat drinken had. In Wolvege he’k nog wat bosschoppen daon en doe bin ‘k bi’j de Scheene aachter Hooltpae langes weer op huus an gaon. Onderwegens he’k vanzels ok een foto maekt. Hieronder kesteel Olt Stoutenburght van Gregorius Halman, Heer van Blesdieke.