Vrij uitzicht

Vandemorgen he’k een heerlike ontbijtkoeke bakt en omdat et vandemiddag zok mooi fietsweer was he’k even op ‘e fiets naor Wolvege west om wat bosschoppen op te haelen. Ik hebbe mitien een boek liend in de biebeltheek. Daor lag et jaorlikse kedo veur me klaor. De 61^ste drok van et bekende boek Joe Speedboot van Tommy Wieringa. Ik bin beni’jd! Vanaovend bin ‘k ok beni’jd hoe et gaon zal mit de beide manluden uut Stiens en Goutum die gisteraovend in een sneltreinvaort deur de eerste ronde van de altied nog mooie tillevisiekwis Per seconde wijzer kwammen.

Ik hebbe de thriller Vrij uitzicht van Anya Niewierra lezen. Dit is et vierde boek da’k van ’t jaor van disse Limburgse schriefster lezen hebbe. Ik de kaaste stonnen al: Het dossier, De camino en De nomade. Prachtige boeken. En now dus Vrij uitzicht. Et gaot over zaekevrouw Tess Clement die nao 25 jaor weerommegaot naor et Zuud-Fraanse bargdörp Mosset daor ze ooit betrokken was bi’j een raodselachtige verdwiening. Ze is van doel en maek van et ieuwenoolde kesteel een hotel en museum en daor is niet iederiene gelokkig mit. En dan komt d’r een geheimzinnige kesteelbewoner in heur leven…