Vraogtekens

Gister stonnen d’r zomar inienend drie vraogtekens in mien dagboekstokkien. Et is me een raodsel hoe dat kon. Op et plak daor een a mit een kappien, een e mit een strepien en een o mit een umlaut stonnen, is dat veraanderd in een vraogteken. Ik hebbe een mailtien naor de webmaster stuurd om te vraogen hoe dat kan. Ik zal mar niet meer van die tekenties bruken. Ik alle gevallen gaot zoks goed, mar naor et mailadres van mien dagboekstokkien gaot et mis.

En dan nog even over vri’jdag en oonze treinreize naor Breda. In et Valkenberg park, waor vroeger de Hoftuun van et Kesteel van Breda was, leupen een man en een vrouw, elk mit een grote tasse, bi’j de ofvalbakken langes om blikkies en flessies op et scharrelen. Jan Berend en ik hadden jammer genoeg niet zoe’n grote tasse bi’j oons. Hawwe dat wel had, dan hawwe oons lichtkaans niet bedwingen kund en sluut oons bi’j die beide blikkies- en flessieszukers an. We moe’n d’r dus omme daenken dawwe de volgende keer zoe’n grote tasse mitnemen. Hieronder nog twie foto’s die ‘k maekt hebbe. Boven: et Stedelik Museum zit in een prachtig gebouw. Onder: dit is et Kesteel van Breda, daor in vroeger tieden de Bredase Nassaus woonden en daor now de KMA in zit.