Johan Veenstra
Stellingwarver schriever en verteller

Vollenhove

Plaetst op 18 april 2024.

Gisteraovend he’k naor Vollenhove west. Ik moch daor vertellen veur 22 leden van de vrouwludeverieninge. Ik was al es twie keer eerder bi’j heur west. In 2003 en 2018. Dit het ongetwiefeld de laeste keer west. Ik stao altied te vertellen, mar dat heb ik now niet daon. Ik hadde van teveuren al vraogd a’k d’r bi’j zitten moch. Ik vermoedde da’k aanders wat zweverig in et heufd wodden zol. Dat was ok zo, dat vernam ik wel a’k van de taofel ofkwam. Mar daor op zittende gong et vertellen goed. Ik lieke now op Lamkje Hof-de Boer. Vrouw Hof het indertied meer as duzend keer vot west te vertellen en zat altied op een taofeltien. Et was vanzels wel een waogstok en gao as Stellingwarver naor Vollenhove. In 1309 trokken daor koppels Stellingwarvers henne om te vechten tegen de mannen van dat misbaksel van een bisschop van Utrecht. D’r bin doe 500 Stellingwarvers sneuveld. De ienige echte veldslag uut oonze geschiedenis hewwe dus verleuren. We hoeven oons niet echt op ‘e bost te kloppen vanwege een heldhaftig verleden. Mar d’r is mi’j gisteraovend niks mals overkommen. Et was gister mitien een goeie oefening om in et donker te rieden in de ni’je auto. Dat gong prima en ok nog wel zonder brille. Ik zag alle (auto)lochten now weer as gewone lochten en niet meer as grote straolekraanzen. Een weke of wat leden was et mar kwaolik vertrouwd da’k op een aovend vanuut Norg naor huus ree. Doe was et in wezen hatstikke griezelig rieden. Wat een verschil mit now. Onderwegens naor Vollenhove zag ik prachtige velden mit bluuiende tulpen. Wat mooi!

As d’r wat extra spanning en gedoe is, krie’k altied hinder van zere spieren in schoolders en nekke. Now vanzels ok. Dat ik zal maendag naor Marian veur fysiotherapie. Ik bin in et verleden al meerdere keren naor heur toe west.