Johan Veenstra
Stellingwarver schriever en verteller

Volendam

Plaetst op 2 oktober 2024.

We bin vandaege naor et mooie Volendam west en daor was et nog drok mit toeristen. Hiele kloften butenlaanders leupen daor mit een gids over de Diek. We hebben daor eerst waarme poeiermelk en een stok appelgebak had in resteraant Thirty5. De Jan Smit veerde of en an van Volendam naor Marken en weeromme. Jelle en ik bin al es mit oonze fietsen op dat schip overzet van Marken naor Volendam. We hebben daor vanzels wat in winkelties en zo ommesnuuid en ik hebbe wat lekkere sjerpwaofels kocht. We hebben et Volendams Museum ok bekeken. Wat is dat een mooi museum! Van alles over de viskeri’je, de klederdracht en netuurlik alle beroemde zangers en groepen die daor wegkommen. Ie konnen ze ok allemaole op filmpies zien. BZN mit Annie en Carola, The Cats, George Baker, Piet Veerman, Nick en Simon en de kleine Jannegien Smit en de grote Jan Smit. Et was allemaole prachtig om te zien, te bekieken en te beluusteren. D’r was ok een enorme verzaemeling segarebaanties in dat museum. Now ja, wie het d’r gien segarebaanties speerd? Wi’j dus allebeide wel. Ik hebbe ze nog! Allemaole jeugdsentiment. An et aende van de middag hewwe eten in resteraant De Vrijheid en de mienings over de kwaliteit van et eten verschilden nog al. En now zeg ik et veurzichtig. Mar ondaanks dat was et een prachtige dag. Et was donker en wat kil en wienderig weer. Gien mooi fotoweer. Hieronder toch twie foto’s. Iene butendeure op ‘e Diek in Volendam en iene in et museum.