Voegelties

Ik voere op drie verschillende plakken de voegelties in de tuun en hebbe zodoende van alles om de deure: koolmesies, pimpelmesies, vinken, boomklevers, een roodbossien, zwatte liesters en doefies. Zo now en dan komt d’r ok een mooie markloper en laestdaegs weren d’r twie spannegies statmesies. Ik kan d’r tieden naor kieken!

Doe ‘k gister thuuskwam van mien uutstappien naor Harlingen zag ik dat et mooie tiedschrift Landleven in de brievebusse zat. Mooi dat ze me een exemplaor toestuurd hebben. Now kon ik dus ok et interview lezen dat Jolanda Hofland mit me had het en de grote foto bekieken die Ingrid Sweers van me maekt het bi’j de Kuundersluus tussen Berkoop en Ooldehoorn. Hieronder nog een foto die ‘k gister in de mooie stad an ’t Wad maekt hebbe. Dit mooie gebouw vaalt je drekt op aj’ in Harlingen Haven uut de trein stappen en naor de binnenstad lopen. In 1884 wodde et bouwd as gerechtsgebouw op et plak daor vroeger de Leeuwenburg ston. Dat was een gebouw van de Friese Admiraliteit. In et gebouw zit now et bekende resteraant ’t Havenmantsje.