Voegeltien

Gisteraovend kwam poes Marja mit een klein levendig voegeltien in huus. Harrekrastes toch, wat een malle streek. Ik hebbe raosd, poes leut et voegeltien los, dat flodderde naor et raem, poes en ik d’r aachteran, een bloempot gong ondersteboven. En doe zat poes mit et voegeltien in de bek op ‘e trappe. Ik hebbe weer mal raosd, poes leut et voegeltien weer los. Ik hebbe de katte opsleuten en doe et voegeltien oppakt. Hi’j hadde allienig mar een peer losse veerties, mar him mekeerde zo te zien niks. Hi’j het butendeure wel een kertier op mien doem zeten. Doe he’k him staorigan op een takkien van een heester zet. Laeter was hi’j vot. Die he’k et leven dus redded. Een etisch gesprek mit poes het nog gien risseltaoten opleverd.
Vandaege het Anke et huus schonemaekt. Zi’j gaot now op vekaansie en komt eerst over een maond weer. Ik doe heur wark in tussentied niet. Ik bin een groot pat van de dag toch niet thuus. Vanof morgen bin ‘k halve daegen in Berkoop, smerig wodt et dus niet. Vandemiddag he’k nog even op ‘e fiets naor Wolvege west om een boek uut de biebeltheek te haelen en wat bosschoppen uut de supermark. Ik kreeg iederkeer praot. En haost iederiene waor aj’ mit praoten zegt dat et zoe’n malle wereld an ’t wodden is. Zo is dat en we bin d’r nog lange niet. Dit is vermoedelik nog mar et begin. De klimaotveraandering zal rampen over de wereld brengen daor we now et begin van zien. Mooier kan ‘k et niet maeken. Mar ik gao hadde warken en… genieten op Eupen Stal!