Vlindervallei

Vandemorgen he’k op ‘e fiets naor Marian in Wolvege west veur fysio-massage. Ik hebbe ok wat oefenings mit naor huus kregen, want et knapt niks op. Ik hebbe trouwens veurda’k votgong nog zorgd dat de tuunman en de tuunvrouw koffie kregen. Ze weren d’r al om acht ure en doe ik weer thuuskwam van fysio lag alles d’r hatstikke netties bi’j en weren ze al weer naor de volgende klus. Op et ogenblik bluuien de drie vlinderpollen in de tuun uutbundig en d’r fladderen tientallen vlinders deur de tuun. Alderhaande soorten. Een prachtig gezicht. Ik hadde d’r ok al iene in huus. Ik hebbe de veurdeure wiedewaegen veur him loszet en doe is hi’j weer votvleugen. Et liekt hier zuver wel wat op ‘e vlindervallei van Rhodos.

Op 2 september 1976 weren kammeraod Haarm en ik mit een exkursie in die beroemde vlindervallei. We reden in een bus tussen bargen deur en d’r zweefden duzenden en duzenden vlinders. Ik hebbe zoks nooit weer zien. We weren twie weken op Rhodos. Vanof et straand koj’ Turki’je liggen zien. Haarm vertelde me daor wat, daor ik een naacht van wakker legen hebbe… We gongen daor wel omme mit de femilie Piek. Man en vrouw Piek weren beidend zo bruun as bi’jen en man Piek hadde een zulveren of goolden ketten om de nekke. Doe wi’j weer naor huus gongen en veur et hotel in de bus stapten die oons naor et vliegveld brengen zol, zwaaiden zi’j oons nao. Hieronder twie foto’s. We kochten daor geregeld een Nederlaanse kraante en die gong dan mit naor et straand. Dat is van ’t jaor dus vuuftig jaor leden. Waor bin de jaoren bleven…