Vlinders

Vandemorgen het Anke hier de boel schonemaekt, ik hebbe intied even op ‘e fiets naor Berkoop west, en doe ‘k weer thuuskwam fladderden d’r een peer citroenvlinders om huus henne. Ik wor d’r altied bliede van a’k jaors de eerste vlinders weer zie. Dan is et echt veurjaor an ’t wodden. D’r kwam ok een verzuuk over de mail daor a’k spietig genoeg niet an voldoen kon. Een dochter mailde me dat heur moeder wegraekt was en dat de ofscheidsdienst donderdag wezen zal. In heur pepieren hadden ze een netisie van heur vunnen dat mien gedicht Laeter dan veurlezen wodden mos. Mar de tekst zat d’r niet bi’j. As ik die wel sturen wol. Ik hebbe alles naokeken, mar in al mien dichtbundels komt gien gedicht mit die titel veur en in mien komputer zit d’r ok gieniene. En dan weet ik et veerder ok niet… Mar spietig is et wel. Vandemiddag he’k vesite had van Eddy van der Noord, de man van uutgeveri’je Louise in Grou. Ik kenne Eddy van et mooie projekt Iisbaen yn ‘e maaitiid. Daor he’k indertied een gedicht veur schreven dat in dat mooie boek staot en dat een hiele poze op een bod bi’j de iesbaene van Ni’jlaemer staon het. We hebben et had over een eventueel ni’j projekt. As et wat wodt, heuren jim d’r wel es een keer wat van.