Vlinderparredies

We weren van doel en gao vandaege fietsen in Exloo. De fietsen stonnen al klaor, mar we bin niet gaon. Et was niet echt mooi fietsweer. Et regende wat en et zol tot half twieje wat regenen blieven kunnen. En dan mossen de bujjen nog over Drenthe. En om now in de regen te fietsen, daor hawwe gien nocht an. Et wodde trouwens om vier ure vandemiddag eerst echt mooi en zunnig weer. We bin dus mit de auto op pad west en wel naor Drenthe. In Haovelte hewwe et Vlinderparredies bekeken. Een betien dateerd leek et me zo toe. We hebben mar een stokmennig vlinders zien. Bi’j mi’j in de tuun mit de drie vlinderpollen bin d’r meer. De jonge aachter de balie zee al dat et eins wat te donker was veur de vlinders. Mit zunneschienweer weren d’r meer te zien. We hebben d’r nog wel wat drinken en een koeke had. Doe biwwe bi’j de mooie schaopskooi langeslopen, et Holtingerveld in, naor de beide hunebedden van Haovelte. Een mooie kuier. We slingerden onderwegens an de praot mit vier slim fleurige vrouwluden uut Bussum en een al lieke fleurige man uut Maarssen. Onderweg was ok een bomkrater vol waeter te zien. De Duutsers legden in de oorlog een vliegveld an bi’j Haovelte en dat is grif onder vuur neumen deur Engelse vliegmesienen. Bi’j een toeristisch infermaosiepunt koj’ mooie wollen sokken kopen veur 27 euro. D’r hong een grote kaorte van de wondermooie omgeving daor Ni’jhooltpae ok nog op ston. Et ston angeven as Nijenholtpade. Mit een n d’r in. Op zoe’n plak waor ze de naeme van mien dorp niet iens goed vermelden kunnen, koop ik vanzels gien sokken. En zeker niet veur 27 euro. We hebben vanaovend lekker eten had in et resteraant bi’j de Koepelbos. Hieronder drie foto’s van vandaege. Boven: een vlinder in et vlinderparredies. Midden: wat pollegies bluuiende heide in et Holtingerveld. Onder: ien van de beide hunebedden van Haovelte.