Virus

De haast is kwaolik begonnen en ik hebbe et eerste virus al weer te pakken. Zo gaot et ieder jaor en et gebeurt disse winter grif nog wel vaeker. Ik hebbe weinig weerstaand. Ik bin mu en wat hangerig, hoesterig en mien stemme is schor. En ankem weke za’k drie keer optreden. Hoe komt dat? D’r bin now toch ok altied dingen waor a’k me zorgen over maeken moet.

Vanaovend is de twiede sutelaovend, mar ik kan me veurstellen dat et oflast is vanwege de bujjen. Dat zol aanders een malle tegenslag wezen, want we hebben et geld slimme neudig. Maendagaovend het de sutelaktie 800 euro opbrocht. Aorig dat me dat even maild wodde. Zo blief ik d’r toch nog wat bi’j betrokken.

Vandemorgen kwam Taeke uut Jutriep hier om een twiedehaans boek op te haelen: Stellingwarver Stiekelstokkies 3. Ik vien et vreselik aorig dat d’r meensken binnen die gewoon alles van me hebben willen. Ik zal him tiedinge doen a’k de eerste twie Stiekelstokkies-boekies ok nog es weer te koop hebbe.

Gister kwam d’r een kaorte van Henk en Lieneke Tragter. Die zitten zo te zien in Callaansoge. Veur mi’j een slim bekend plak, want we gaon d’r ieder jaor minstens ien keer henne om een straandkuier te maeken.