Video’s

Op disse ni’je website van mi’j staon now ok een peer videofilmpies. Mit daank an webmaster Pieter. Kiek mar es bi’j de rebriek Video’s. Hier kuj’m de filmpies bekieken die vleden jaor te zien weren op keunstmannefestaosie Eupen Stal in et gebouw van de Stellingwarver Schrieversronte in Berkoop. Ik leze twie gedichten veur: Veertien van een markloper uut de bundel Longerlaand uut 2007 en Mien oolde huus uut de bundel Sletel parredies uut 1994. De beelden bin maekt deur dokumentairemaeker en videokeunstener Pat van Boeckel. Ik kreeg daor vleden jaor in Berkoop een protte komplementen veur. D’r kwam zels een vrouw goelende bi’j weg. Ik hadde dat eerst niet in de gaten, ston mit Francine te praoten, mar die maekte me d’r opmarkzem op. Ontroerden gedichten en beelden heur? Of herinnerde et heur an wat mals wat heur overkommen was? Zeg et mar. Dat za’k nooit te weten kommen. In Berkoop weren de filmpies te bekieken in een verduusterde omgeving. Doe et locht dus mar even uut, beste dagboeklezers, en dan et spul mar rustig bekieken en beluusteren!