Veurraod opnemen

Ik bin zowat de hiele dag, van vandemorgen half 10 tot vandemiddag 4 ure, op ‘e daghure west bi’j Jarmo (computerservice Hofma). We hebben de komplete veurraod opneumen. Een peer keer hewwe even schoft hullen veur een bakkien drinken en tussen de middag hewwe lekkere bolties uut de supermark haeld. Om 4 ure hawwe tegere een allemachtige hoop wark daon en dat gaf een goed gevuul, mar we hadden allebeide de pochel wel uut.

As ik de laeste daegen op mien eigen webstee kieken wil, krie’k sebiet een waorschouwing te lezen: Potentiële poging tot phishing. Ze daenken dat mien webstee bezukers verleidet om gevulige infermaosie te geven, zoas anmeldingsgegevens of creditcardnommers. Dat is vanzels niet zo. Ik bin hatstikke goed te vertrouwen. Wat een gedoe now toch weer. As d’r dagboeklezers binnen die ok zoe’n waorschouwing kriegen dan kun jim gewoon op bedreiging negeren klikken. Jarmo het vandaege een mail verstuurd dat ze mis binnen en dat ik slimme betrouwber bin en gien malle dingen in et zin hebbe. Mar… ie hebben mar weer drokte mit disse onzin.