Veurbi’j De Westereen

We hebben vandaege een heerlike boottocht maekt. De temperetuur leup op naor 26 graoden. Uut de wiend was et waarm, mar op et eupen waeter ston d’r lekker wat wiend. Meerstal stuur ik, mar we hebben now ofwisseld. Dat ik hebbe ok heerlik op een baank legen, pettien en zunnebrille op. We hebben al weer niet op een terras eten, we hadden alles weer bi’j oons an boord. We bin over et Preenses Margrietkenaol naor Burgum veerd. Daor veren ok grote vrachtschippen. Ie moe’n dus algedurig stuurboord anholen en et is an te raoden om zo now en dan even aachteromme te kieken as d’r ok zoe’n groot schip aachter je zit. Op et Burgumermeer biwwe de Kuukhornstervaort opgaon. We bin tot een aende veurbi’j De Westereen veerd. Daor woont webmaster Pieter trouwens. De streek van Burgum en De Westereen was vroeger iene bonke aarmoede. Lees de boeken van Abe Brouwer (Marijke) en Rink van der Velde (In fin mear as in bears) mar es! En now staon d’r kaptaole villa’s an de Vaort. Hieronder twie foto’s van huzen an de Kuukhornstervaort. Boven: een opknapt en vergroot husien uut 1736. Dat is lange leden. Doe woonden de Nassau’s nog in Liwwadden. Onder: ien van de mooie villa’s an et waeter. Veur zoks zuj’ wel een stuver of wat daeletellen moeten as et koop kommen zol.