Veurbereidings veur morgen

Ik bin gister zo mu wodden da’k vandemorgen pas om half 9 wakker wodde. Zo laete bin ‘k nooit. Ik hadde krek droomd da’k veur de eerste keer mit mien vader in de kunde kwam. Dat was in de droom een man die vule jonger was as dat ik now bin. Mar in een droom kan alles. Vandemiddag om kwat veur 3 he’k veurlopig veur de laeste keer wat licht eten had. Ik bin now krek klaor mit de veurbereidings veur morgen, ik hebbe dus, krek as gister, vieze troep opdronken. Dat doe ‘k morgenvroeg tussen kwat veur 7 en kwat veur 8 ok weer. Laeter op ‘e morgen is et inwendige onderzuuk van de dikke daarm in et ziekenhuus. Gister was de dunne daarm an de beurt. Morgen brengen ze me in de soeze.

Gister kwam d’r een kaorte van Jan en Klasien uut et mooie Holten. Ze hebben daor heerlik fietst. Wi’j bin vleden jaor nog in et Netuurmuseum op ‘e Holterbarg west en zaggen doe ok daj’ daor prachtig fietsen kunnen. Dat bin wi’j dus ok nog een keer van plan.