Veul heil en zegen!

Vandemorgen betied vleug d’r iene ienzem gakkende gaanze over mien huus. Dat het grif Gustaaf west die veul heil en zegen gakte. Et kan haost niet aanders. Zorgen jim trouwens goed veur de voegelties in de winter? Ik geve ze volop voer en ze kun ok niet zonder drinken. Et waeter in heur drinkersbakkien bevröst vanzels as et best vostig is, mar dan giet ik d’r zo now en dan wat waeter op. En dat hebben ze drekt in de gaten. Vleden weke kwam d’r doe drekt een koolmesien bi’j te drinken. En ok een mooie, grote markloper. Ik hebbe d’r mit genoegen een schoffien naor staon te kieken. Dat is aorig mooier om naor te kieken as naor al die praotpergrammes op ‘e tillevisie. Daor kiek ik aenlik nooit meer naor.

Vandemorgen kwam Jarmo nog even langes en Harry en Jan brochten een trommegien mit knieperties. Ze bin hiel lekker! Et spiet me nog altied slim da’k mit heur beidend en Frans niet uut eten kon op eerste kastdag. Mar ja… Vleden jaor zat ik op ooldejaorsaovend allienig, doe he’k et oolde jaor niet uutzeten. Wat moej’ allienig ok. Vanaovend kan ik weer naor Haarm en Jacob in Et Vene. Dan zit ik et oolde jaor bi’j heur uut en kom ik vannaacht weer thuus.

Ik weens alle dagboeklezers en -lezeressen een goeie jaorwisseling toe en veul heil en zegen in et ni’je jaor!