Vesite uut Sumar

Ik hebbe vandemiddag vesite had van Ids en Eeke uut Sumar. Ik kreeg een peer breiden sokken die Eeke zels breided hadde. Dat vien ik mooi! Ik hebbe in huus altied wollen sokken an. Die dunne voddegies vulen niet lekker an de voeten. Ids is een aachterneve van me. Hi’j is een zeune van neve Jaap en zien vrouw Maggie. Ze verhuusden vroeger van Ni’jhooltpae naor Ferwerd, daor Jaap bi’j de KI warkte. Ik kwam mit mien moeder vroeger wel bi’j heur. Veurda’k een auto hadde mit bus en trein… En laeter, doe mien moeder d’r niet meer was, ok nog wel a’k in Ferwerd of daor in de buurt vertellen moch. Dan at ik wel es een broggien mit heur mit. Et is mooi da’k now nog mit Ids en Eeke kontakt hebbe. We hebben slimme genoeglik bi’jpraot en ik zal ok es weer naor Sumar toe.

Webmaster Pieter het et lietien daor a’k gister over schreef now as YouTube onder et dagboekstokkien van gister zet. Ie kun d’r now zo op klikken en dan heur ie et lied over mi’j en poes Marja. En op ‘e dag dat Sonja Barend uut de tied raekt is, zeg ik een betien betied want et is nog gien aovend: Veur aanst lekker slaopen en morgen gezond weer van bedde.