Vesite uut de Aachterhoeke

Vandaege bin Jan en Diana uut Aalten hier op vesite west. Ze weren d’r vandemorgen om kwat veur elven henne. We hebben eerst wat drinken en oranjegebak had en vanzels uutvoerig bi’jpraot. Tussen de middag hewwe hier gruuntesoep mit ballegies had en brood. Ik hadde bolle die bakt is mit tarwemael dat maeld is deur de meule De Weijert in Makkinge. Vandemiddag biwwe d’r op uut west. We hebben eerst de karke van Berkoop bekeken. Die was los in verbaand mit Tsjerkepaad. Nao Berkoop biwwe naor Makkinge reden. Daor was et dörpsfeest. We hebben museum Oold Ark en de meule De Weijert bekeken. Allebeide slim de muuite weerd. Ik was d’r wel es eerder west, mar dat was misschien wel twintig jaor leden. Mooi dat de meule nog in bedrief is! In Ni’jhooltpae was de karke ok los, dat die hewwe ok nog bekeken. Daor was ok een mini-tentoonstelling te bekieken over de waetersnoodramp van 1825. We hebben vanaovend heerlik waarm eten had in resteraant Boszicht in Ni’jberkoop. Om even nao zeuven ure bin Jan en Diana nao een blinders mooie dag weer vertrokken naor Aalten. Hieronder nog een foto van vandemiddag. In Makkinge hewwe tussen et bekieken van Oold Ark en de meule deur een koppien drinken had mit wat lekkers d’r bi’j. We hebben daor trouwens ok van alderhaande lekkers kocht!