Vesite uut de Aachterhoeke

Vandaege he’k Jan en Diana uut Aalten op vesite had. Ik gao ien keer in et jaor naor heur toe en zi’j kommen hier een dag. Ze weren hier vandemorgen even veur elf ure. We hebben genoeglik wat bi’jpraot en ik hadde gebak van de waarme bakker. Tussen de middag hewwe hier eten. Ik hadde een panne gruuntesop mit ballegies klaormaekt en van dezelde waarme bakker weren d’r lekkere bolties waor ze van alles tussen doen konnen. Nao et eten biwwe naor Noordwoolde gaon. Et was Eupen Monementedag en daor hewwe gebruuk van maekt. Eerst hewwe de mooie meule bekeken en vervolgens hewwe een bustochien deur Noordwoolde maekt om de monementen te bekieken onder leiding van gemienteraodslid en historikus Cor Trompetter. In de kosteri’je het hi’j een verhael (plus dia’s) verteld over de geschiedenis van Noordwoolde en doe hewwe de karke bekeken. Een man klopte me daor even op een wange en zee dat hi’j mien stokkies in de kraante zo mooi vun. We hebben ok et Jodekarkhof bekeken. Wat een mooi plak is dat. Ik wus nooit percies waor dat was, mar now dus wel. Zonder et te weten bin ‘k d’r wel es bi’jlanges fietst. Zo now en dan stopte de bus even en dan vertelde Cor over dat betreffende plak. Nao de bustocht hewwe et Nationaol Vlechtmuseum bekeken en netuurlik de wiege daor Beatrix vroeger in lag. D’r was ok een mooi filmpien te zien van de vesite van Beatrix in meie. Op et terras van et oolde tramstesjon hewwe wat drinken had. We bin doe nog even naor mien huus west en doe biwwe naor resteraant De Rustende Jaeger in Hooltpae gaon om te eten. Tot halverwege dit jaor hadden Marcel en Marja Kasmarek daor et heft in hanen en et eten was daor altied heerlik. Now het Freek Spiekhout et roer overneumen en et eten is nog altied lieke heerlik. Echt veurtreffelik! Jan en Diana bin hier om kwat over zeuven weer in de auto stapt naor huus toe. Hieronder twie foto’s van een mooie dag. Boven: Jan en Diana op en bi’j een baankien bi’j de meule van Noordwoolde. Onder: hier zitten we an de eterstaofel in Hooltpae.