Vesite

Vandemorgen he’k Peter (Hiemstra) op vesite had. We hebben genoeglik bi’jpraot en we hebben et had over de zeuventiende juli. Dan mag ik tiedens Eupen Stal aovens optreden as verhaeleverteller mit kammeraod Douwe Kootstra. Douwe vertelt in et Fries en ikke vanzels in et Stellingwarfs. Oonze verhaelen wo’n ofwisseld mit optredens van een harpiste uut Zwolle daor ik de naeme nog niet van wete. Ze zal binnenkot kontakt mit me opnemen om et over et pergramme te hebben. Ik zal ok mit Douwe overleggen. En dan wodt et grif een mooie aovend in Berkoop. Ik kreeg een prachtig kedogien van Peter. Zien ni’je boek Nigra sum sed Formosa over de zwatte madonna, dat hi’j maekt het mit Malvine Marichal.  Daor laeter meer over.

Vandemiddag he’k even op ‘e fiets naor Berkoop west. Ik wol Arjan nog even een haand geven. Arjan was sund 1 jannewaori direkteur van de Stellingwarver Schrieversronte en gaot op 1 meie al weer vot. Hi’j zol vandaege en morgen nog op kantoor wezen, mar ik kwam in Berkoop veur de toedeure. Nargens was een meens te bekennen. Ik weens Arjan vanzels alle goeds veur wat hi’j in zien veerdere leven nog doen gaot. Et spiet me ommeraek dat hi’j now al weer bi’j oons weggaot.

En dan nog een foto hieronder. Aj’t zo verdienen kunnen, hej’ nog niet zoe’n gek leven. Poes Marja op een keukenstoel in de zunne.