Vesite

Vandaege is et de jaordag van mien moeder. Ze is 114 jaor leden geboren… Wat is dat al lange leden. Mar vroeger is nooit veurgoed veurbi’j, want ze reist algedurig mit me mit deur mien leven en dromen. Ik hebbe vandemorgen even naor de Schrieversronte in Berkoop west om wat exemplaoren van Et liek in de Lende op te haelen veur de verkope. Doe ‘k thuuskwam he’k een benanebolle bakt. Dat ha’k nog nooit daon, mar ie moe’n alles in et leven vanzels een keer uutperberen. Hi’j is trouwens hiel arg lekker wodden. En doe… kree’k vandemiddag hielemaole onverwaachs vesite an de deure. Jan Peereboom en zien kammeraodske Riny van De Jouwer. Ze hebben hier theedronken en we hebben aldergenoeglikst een schoffien praot. Ik kende de moeder en zeker de grootmoeder van Jan vroeger hiel goed. Zien grootmoeder Klaosien Eits woonde naost oons doe wi’j nog in oons oolde huus woonden. As klein joongien gong ik vaeke naor heur toe, want Klaosien hadde radio van de draodomroep. Dan leup Flora, ien van oonze jachthonnen, altied mit me mit. Flora leup tussen mi’j en de sloot in, zodat et kleine joongien niet in et waeter valen zol. Wat toch een lief dier! Hieronder een foto uut mien archief. Buurvrouw Klaosien zit op ‘e stoel en naost heur staot heur dochter Margje. Dat is dus de moeder van Jan, die bi’j me op vesite was. Margje woonde laeter op ‘e Blesse, heur man was daor melkboer.