Johan Veenstra
Stellingwarver schriever en verteller

Vervolg

Plaetst op 27 jannewaori 2023.

We hebben gisteraovend een geweldig gezellige aovend in resteraant De Rustende Jaeger in Hooltpae had. Dat nog naor anleiding van Pieter zien 70ste verjaordag. Et eten was daor zoas altied overheerlik. We hebben d’r van zes ure tot half tiene zeten. Ik hadde een fototoestel mitneumen zodat dit etentien vaastelegd wodden kon. Mar ik hebbe d’r daor veerder nooit an docht. Gien foto dus. Mar ik kan jim verzekeren dawwe d’r alle viere slimme jeugdig, vlot en fleurig zatten te eten en te praoten.

Vandaege he’k d’r nog mar een kollum bi’jschreven. Mit et oolder wodden mark ik dat alderhaande winkelmaegies me soms niet meer begriepen. Daor he’k dus wat over schreven. Et is me ok wat. Vandemiddag wa’k even in Wolvege bi’j boekhaandel Zwikstra om wat bestelde boeken op te haelen. Daor trof ik Frits en die zee dat d’r toch beslist een vervolg kommen mos op mien thriller Et liek in de Lende. Dat zeggen trouwens wel meer meensken. Mar hebben ze wel in de gaten hoevule wark as zoks is? En ik wor oolder…