Vertellen in Wapservene

Vandemorgen he’k op ‘e fiets naor de dokter in Wolvege west. De laeste zeuven weken is d’r twie keer bloedprikt. Et is wel goed, ik moet wel extra viteminen hebben. De zere spieren blift lastig. Ik zal now onder ien dak sport en massage hebben, vanof ankem weke maendag. Dan kan mitien bekeken wodden as de toestellen wat zwaorte anbelangt wat anpast wodden moeten. Ik moet vanzels wel in beweging blieven, mar et is dudelik dat hier en daor de boel begint te slieten en dat zorgt veur ongemakken. Ik moet et rustigeran doen gaon. Ik gao niet meer op verzuuk stokken vertaelen of gedichten in opdracht maeken. Ik verwieze in dat soort gevallen naor de Schrieversronte. Daor moe’n ze d’r heur mar mit redden. Ik gao bi’j donker niet meer vot te vertellen en zo. Ik gao niet meer naor vergeerderings en alderhaande bi’jienkomsten. Et gaot d’r zonder mi’j allemaole ok wel omme deur. Wa’k nog wel doe moet over grotere tied verspreided wodden. Ik zal lange niet meer alles doen wa’k tot now an toe daon hebbe. Ik gao nog wel vot te vertellen op middaegen.

Zodoende bin ik vandemiddag naor Wapservene west te vertellen veur zestien oolderen. Ik hadde om een taofeltien en een stoel vraogd. Dan kon ik daor eventueel op zitten. Mar ik hebbe toch alles staonde vertellen kund. Et gong goed, behalven in ien verhael. Daor leup ik vaaste en mos ik op pepier kieken. Dat is in jaoren niet gebeurd. Mar et verwonderde me niet, want ik hebbe almar meer tied neudig om de boel weer goed uut et heufd vertellen te kunnen. De meensken vienen zoks niet arg, ikke wel. Et moet en zal goed en zonder fouten te maeken. Ik zal nooit overgaon tot veurlezen uut eigen wark, behalven in bepaolde gevallen, ik bin een verteller. Aorig was dat ze daor van alles wussen van de Flying Stars uut Hooltpae. Ze hadden daor ok zoe’n kabberetgezelschop had en ze wisselden wel van schetsies. Ik bin nao ofloop nog even bleven om een schoffien nao te praoten.

Hieronder twie foto’s. Boven: dit is De Wiekslag in Wapservene. Hier he’k vandemiddag verteld. Onder: disse foto wodde me toe-appt deur Douwe. Hi’j en Romkje bin op vekaansie in et depattement Haute Marne in Frankriek.