Vertellen in Tjerkwerd

Vandemiddag moch ik verhaelen vertellen veur een klein koppeltien van zeuventien meensken in Tjerkwerd. De koppelties wo’n almar kleinder. Tjerkwerd is een klein dörp mit mooie smalle straoties. Ik bin d’r ooit ien keer in mien leven eerder west en dat is haost vuuftig jaor leden. Mien kollega Fedde die tegenover me zat op et CK van de belastinginspektie in Et Vene trouwde mit Sara die daor wegkwam. We bin doe bi’j de huweliksvoltrekking west in et stadhuus van Bolsward deur de burgemeester en in de karke van Tjerkwerd. Wat is dat lange leden! Sara hadde een blauwe jurk an. Et wonderlike was dat de vrouw die me vandemiddag ankondigde een mujke van heur was. Hoe wil et zo toevallig. Ik hebbe daor verteld in dörpshuus It Waltahûs, dat leit pal an de Workumer Trekvaort daor de rieders van de Elfstedetocht langeskwammen en hopelik ooit nog es weer langeskommen. Ik hebbe ze daor eerst de groeten van Hylke Speerstra daon. Die beroemde Friese schriever komt daor ok weg. Hylke belde me vleden weke mit mien verjaordag en doe ik zee da’k naor Tjerkwerd zol te vertellen vreug hi’j me om ze daor de groeten te doen. En ja, ze wussen daor ok da’k jaorig west was, dat ze zongen veur me! As dat niet een mooi welkom is weet ik et ok niet meer. Et het me daor vandemiddag best voldaon en et vertellen gong goed. Ik hadde alles goed rippeteerd en hebbe gien malle fouten of versprekings maekt. Hieronder twie foto’s. Boven: Ik hebbe een foto van It Waltahûs en de karke maekt. Onder: Gerben Wijnja het een foto maekt doe ik an et vertellen was. Gerben kreeg op kweekschoele De Him in Sneek Nederlaans van Frits Plantinga. En ik kenne Frits dus ok. Dat is ok al weer wonderlik!