Vertellen in Franeker

Om de veertien daegen staot d’r op ‘e deensdag een kollum van me in de Liwwadder Kraante. Ankem weke is dat even aanders. In verbaand mit Keuningsdag staon d’r deensdag gien kulturele rebrieken in de kraante. Mien kollum is toekem weke op woensdag te lezen.

Vandemiddag he’k naor Franeker west om te vertellen veur de leden van PCOB/Anbo in De Rank naost de vroegere geriffermeerde karke an de Zulverstraote. De karke wodt verbouwd, d’r kommen acht appattementen in. Ik hebbe de auto op et parkeerterrein van de Albert Heijn zet en bin doe over et hoolten broggien naor de binnenstad lopen. Bekend terrein. Ik bin wel een peer keer eerder in De Rank west. Dat hoolten broggien is vlakbi’j de Stadsharbarg. We veren ien keer in et jaor mit de boot onder datzelde broggien deur en dan eten we op et terras van de Stadsharbarg. Et vertellen gong prima, ik hadde dan ok hiel goed rippeteerd. De veurzitster zee dat et mooier was as dat ze docht hadde dat et wodden zol. Now, dat is toch mooi. Et vertelseizoen is now veurbi’j. Hieronder twie foto’s die ‘k vandemiddag maekt hebbe. Boven: gezicht op Franeker, naost et hoolten broggien. Onder: De Stadsharbarg daor we elk jaor op et terras eten.