Vertaelwark

Vandemorgen he’k de kollum die ‘k morgen versturen zal nog es goed naokeken. Aanders doe ‘k dat op donderdag altied, mar ik bin morgen de hiele dag op ‘e vlieg. Nao et eten he’k een aentien kuierd. Et was mooi en zunnig weer. Op ‘e brink, midden in et dörp, is et paors van de krokussen. Wat toch een prachtig gezicht. Vandemiddag he’k vertaelwark daon veur et Nationaol Vlechtmuseum in Noordwoolde. Een schoffien leden he’k heur Audiotour in et Stellingwarfs vertaeld. Nog even wat dat kuieren anbelangt. D’r bin al meensken die liever niet allienig uut kuieren en fietsen gaon in verbaand mit de wolven. Ik durve dat nog wel. Ok las ik in de kraante dat goenend ok wat schoftig binnen en laot kleine kiender allienig butendeure speulen. En dan veural in de streken daor wolven zien wodden en aktief binnen. Is bekend dat wolven ooit meensken pakt hebben? Ik hebbe daor nog nooit van heurd. Ik wete allienig van de grootmoeder van Roodkappien en d’r bin ooit meensken west die tiedens een tocht mit een slee naor Omsk deur wolven naozeten wodden en doe hebben ze een stokmennig kleinjongen opofferd en overboord zet. Mar alle gekhied op een stokkien: hebben wolven ooit meensken pakt?

Zaoterdag over een weke, op 8 meert, bin ik mit een boekekraom op ‘e hobbymark in et dörpshuus van Beetsterzwaog. Kom dan mar bi’j me langes om een boek te kopen. Meer as iene mag ok wel! Steun et Stellingwarfs!