Vertaeling

Vandemorgen he’k vesite had van Jessica uut Zaandhuzen. Zi’j is de buurvrouw van Berend en Lutske en dat bin dan weer de breur en et snaorske van kammeraod Jelle uut Sneek. Zo is de cirkel weer rond. Ik trof Jessica tiedens de Eupen Stal van dit jaor. Ik ston daor boeken te verkopen en zi’j kocht een boek van me. En doe vertelde ze me dat foto’s van heur op een tentoonstelling te zien wezen zollen. As ik misschien heur Nederlaanstaelige onderschriften in et Stellingwarfs vertaelen wol. Dat he’k dus daon en we hebben vandemorgen genoeglik over die vertaeling praot. Ik hebbe d’r nog iene verbetering in anbrocht en doe wawwe d’r beidend tevreden over.

Een schoffien leden he’k et boek Wat denkt mijn kat van Gwen Bailey lezen. Een prachtig boek mit foto’s en verhaelties van een deskundige op et gebied van dieregedrag. Waoromme geft een katte koppies, waoromme dot een poes dit en waoromme dat. Et is mooi om te lezen. Mar… ik hebbe toch echt et idee dat poes Marja en ik mekeer deur en deur kennen. Ik wete percies wat poes daenkt en hi’j wet sekuur wat ik daenke. We hebben al hiel lange gien geheimen meer veur mekaander.