Vertaelen

Vandemorgen he’k op ‘e fiets naor de mark in Wolvege west om eerpels. Et was best nog wel fris, ik kon de haansken wel an hebben. Nao de mark he’k op vesite west bi’j Gooitske, de wedevrouw van mien aachterneve Joop. We hebben genoeglik even bi’jpraot. Ik hadde d’r al neudig es henne moeten, mar dat is now dus gebeurd. De geleerden zeggen dat et de kommende daegen almar lekkerder weer wodt. Dat zol mooi wezen.

De laeste daegen bin ‘k op verzuuk mit de vertaeling an de gang west van een Friestaelig gedicht van Syds Wiersma. Dat is dreeg wark. Een vertaeling mag nooit verstellingwarfst Nederlaans of Fries wodden. Wat de dichter schreven het moet in goed en geef Stellingwarfs vertaeld wodden en dan moet d’r in wezen etzelde staon. Gao d’r mar an staon. Vertael et zinnegien tsjin de klimwetters stean mar es in geef Stellingwarfs. Dat het me wel een peer zwietdruppen kost. Mar as et dan toch lokt geft dat een lekker gevuul. Ik hebbe et eerste perbeersel vandemiddag opstuurd.