Verschrikkelik

Ik bin gister begonnen en schrabbe et mos tussen de stienen om huus henne weg. Wat een verschrikkelik wark vien ik dat toch. Mar ja, ik wil et wel netties hebben. Nog verschrikkeliker is een aandere put wark daor a’k vri’jdag en vandaege mit doende west hebbe. Et indienen van de dekleraosies veur mien stokkies in de kraante moet hielemaole aanders. Ik hebbe digitaal een haandleiding kregen en dan moej’ mit een komputerpergramme an de gang. De eerste van de drie stappen is et opgeven van alderhaande gegevens mit een digitale kopie van de ID-kaorte. Dat is me lokt. Mar doe mos ik dat spul versturen. Ik mos op Indienen drokken en dan op OK. Mar nargens was OK te vienen. Aovens laete he’k bliekber wat daon en doe zag ik OK staon. Daor he’k doe mar gauw op drokt. Hoe a’k dat OK te veurschien toverd hadde, wus ik niet. Mar de boel was vot. Vandaege kwam d’r een mail da’k et niet goed daon hadde. Ik hadde gien spaties bruken mocht in mien IBAN-nommer. Dat mos ik veraanderen en dan de boel weer opsturen. Dat veraanderen lokte wel, mar ik hebbe wel twiehonderd keer op Indienen drokt, nargens was een OK te zien. Om wanhopig van te wodden. Doe he’k mar beld mit et Dagblad van et Noorden. Uuteindelik het een vrouw die d’r over gaot me weerommebeld. Ik hadde et huusnommer krek op een verkeerd plakkien zet en dan warkt de boel niet. Zi’j het dat even goed veur me daon. Dat was dande eerste stap. Now krie’k nog een kontrakt toestuurd dat digitaal ondertekend wodden moet. Zo’k dat wel kunnen? En as dat rond is kan ‘k op een ni’je meniere dekleraosies opsturen. Mar hoe? Zo’k dat dan wel kunnen? Ik daenk et niet. Wat een vreselike tied. Ik kriege meer en meer et gevuul da’k in een aander zien tied leve. En now kriegen we de Keunstmaotige Intelligentie ok nog over oons henne. Daenken jim echt dat et leven en de wereld d’r mooier en beter op wodden. Ik daenke van niet. Hieronder nog ien keer een foto van een schilderi’je van Marius van Dokkum die ‘k eregister maekt hebbe. Hiel toepasselik! Een peer oolde meensken perberen de tied bi’j te holen. Dat lokt heur niet en mi’j al hielemaole niet.