Verlangen naar vroeger

Vandemorgen bin ‘k om half elven in Wolvege in de trein stapt en naor Liwwadden gaon veur de tentoonstelling Christoffel en Kate Bisschop – Verlangen naar vroeger. Wat een prachtige tentoonstelling! Christoffel Bisschop (1828-1904) wodde in Liwwadden geboren. Ik hadde nog nooit van him heurd. En dan zoe’n goeie schilder! Hi’j trouwde mit de Engelse Kate Swift (1834-1928). Ze woonden laeter in Den Haag en Scheveningen en weren beroemde en hiele goeie schilders in heur tied. Ze hullen niet van de mederne tied, mar verlangden naor vroeger. Zo richtten ze heur huus ok in, mit een protte prachtig antiek. Op ‘e tentoonstelling kuj’ alderhaande mooie kaasten en zo uut heur huzen bekieken. Mar veural de wondermooie schilderi’jen. Prachtig is de grote zael mit schilderi’jen die Christoffel Bisschop in Hindeloopen schilderd het. Allemaole meensken in Hindelooper dracht. Een Fraanse kritikus uut die tied vergeleek ien van Bisschop zien Hindelooper schilderi’jen mit et wark van Vermeer. Now, as ze dat over je schrieven, stel ie wel wat veur. Kate Bisschop was zowat kiend an huus bi’j Sophie, de eerste vrouw van keuning Willem III. Sophie bewonderde heur schilderi’jen en ze was niet de ienigste. De preenzen Alexander en Frederik kochten ok wark van heur. Kate maekte ok een petret van Sophie. Christoffel en Kate beweugen heur zodoende in de hoogste kringen in Den Haag en hadden deur Sophie toegang tot alderhaande hoven in Duutslaand. Gao dit moois bekieken! Hieronder et schilderi’je Leekstertak uut 1897 of 1898 van Christoffel Bisschop. Aj’ in de negentiende ieuw op redens op ‘e Lieke kwammen, nam ie daor een Liekstertakke of Lieksterbloeme of Lieksterblom as souvenir mit weg. Disse jongkerel in Hindelooper kleren het de Liekstertakke op zien buisien. Hi’j rust even uut, het de pupe opsteuken, en stapt aanst weer op ‘e redens. Lieksterbloemen weren van kleurd pepier dat vaastemaekt wodde op een wilgetakkien. Disse gewoonte duurde tot ongeveer 1963. Beroemd is vanzels de ballade van Eeltsje Halbertsma uut 1839 over Marije van Terkaple die mit heur Ids uut rieden was en in et Liekstermeer mit de Liekebloeme op et jakkien in een wak ree en verdronk.