Verkolen

Ik bin al een dag of wat licht verkolen. Et zet gelokkig nog niet echt deur, dat ik hope dat et d’r zo mit henne gaot. Ik zal et vleden zundag wel oplopen hebben in Linde usssen alle volk. Neffens de berichten is d’r vanuut Engelaand een supergriep onderwegens. Uut veurzorg he’k vandemiddag mar goed wat bosschoppen insleugen. As et beter is en blief in huus hoef ik iene aanders niet tot last te wezen. Et is zowat een opgaove en vien een plakkien veur de auto aj’ in Wolvege naor de supermark willen. En dan komt d’r daor bi’j et spoor ok nog een supermark bi’j. Dat wodt iene doffe ellende. Let op mien woorden. Dat zegt iederiene trouwens. Et was vandemiddag ok weer slim drok. In de winkels ok. Wat een gedrang mit al die karregies… Ik wil bi’jtieden hiel arg graeg (veur even) weeromme naor de tied dat Aukje van Feike een pond maelkoekies ofweug en me de blikken sjerppot volschepte mit een grote slief. Wat was et leven doe lekker rustig en overzichtig.

Hieronder een ansichtkaorte die me deur Harry toestuurd wodde vanuut De Jouwer oftewel Balloon City. Hi’j het daor et museum bekeken. Dat is inderdaod et bekieken meer as weerd.